إقلع غماك يا تور وارفض تلف
إكسر تروس الساقية واشتم وتف
قال : بس خطوة كمان . . وخطوة كمان . .
يا اوصل نهاية السكة يا البير يجف
عجبى !!
أنا شـاب لـكن عمـرى ولا ألف عـام
وحيـد ولـكن بين ضـلوعـى زحـام
خـايف ولـكن خـوفـى مـنى أنـا
أخـرس ولـكن قـلبـى مـليـان كـلام
عـجبى !!
بحـر الحياه مليـان بـغرقـى الـحياه
صـرخت خش الـمـوج فى حلقى ملاه
قارب نجـاه ! . . صـرخت قالوا مفيش
غير بـس هو الـحب قـارب نـجـاه
عـجبى !!
بلياتشـو قال إيـه بس فايدة فنونى ؟
وتلات وقق مسـاحـيق بيلـونـونى
والطـبل والزمـامـير وكتر الجـعير
إذا كان جنون زبونى زاد عن جنونى
عـجبى !!
حلـمت الليـلادى، بإنـى فـى موقـف رهيب،
بأقـول، والكـلام مـنـى طـالـع نحـيب …
سيـادى القضـاه،
دفاعـى بسـيـط.
كـلامـى مـاهواش غـويط، وماهواش عبـيط
بـسـيــــط،
بسـاطـة هـدوم الغـلابـا الفـقـارى الحُفاه
بـسـيـط، زى اسـم صديق على شفة صديق
بـســيـــط زى دمـعـــة بـــرىء،
بـسـيـط زى وحـش جـعـان فـى الفـلاه،
بسيط زى حفنة دقيق.
سيـادى القضـاه، يا ذمم يا همم يا قمم ياعتاه،
دفــاعى قـــوى.
قــــوى، زى صــــرخة غـريــق،
بيـنده لـقارب نـجاه بيـنده بآخر قواه، للحياه
دفــاعى قــوى زى دِقْــمـاق حـديــد،
قوى زى نظرة وعيد،
قوى زى تمـثال اله،
قوى زى بلطة رجال الحريق فوق بيبان الحريق
سـيادى القضــاه،
سيــادى الكـرام العـظـام الفـخـام العلاه،
دفــاعى مؤيــد،
مــؤيــد بـكــل الكــلام الـعـظـيـم،
بـتـواره، بـإنـجـيـل، بـمـزامـير داود،
بـقـرآن كـريـم.
دفـاعى مؤيد بكل أنين الكمنجات فى كل الوجود
بكل حفيف النسـيم.
بتهْنـيـنة الأمـهـات للـعـيـال فـى المهود،
بصـوت القُـبـل،
وكـــل ابــتسامــة بــحق وحقــيق،
تـؤيـد دفــاعى.
وبـارفـع صباعى الضعـيف وباقول كلمتى …
سـيادى القضـاه،
سيـادى الحـدادى اللـى حايـمة عـلى رمَتى،
ح اقـول كلمـتى.
لكـيـن قبـل مـا انـطـق واقـول كلمتى …
قـولولى انتـوا ..
إيـه تهمـتى .. ؟؟
جـالك أوان ووقفت مـوقف وجــود
يا تجـود بـده يا قلبى يا بده تجـود
مـا حـد يقـدر يبقـى على كل شىء
مـع إن ـ عجبى ـ كـل شىء موجود
عـجبى !!
قـالـوا الشـقيق بيـمص دم الشــقيق
والنـاس مـا هيـاش نـاس بحـق وحقيق
قـلـبى رمـيتـه وجبت غيـره حـجـر
داب الحجـر . . . ورجعت قلـبى رقيق
عـجبى !!
قالوا السياسـة مهلكــة بشــكل عـام
وبحورهـا يابنى خشنة مش ريش نعـام
غوص فيهـا تـلقى الغرقـانين كـلهـم
شـيلين غنايـم . والخـفيف اللـى عام
عـجبى !!
قالـوا ابـن آدم روح وبـدنـه كـفن
قالوا لأ بدن . قالوا لأ ده روح فى بـدن
رفـرف فـؤادى مـع الرايـات فى الهوا
أنـا قلت لأ روح فى بدن فـى وطـن
عـجبى !!
كيف شـفت قلبـى والنبـى يا طـبيب
هـمـد ومـات والا سـامع لـه دبـيب
قـاللـى لقيتــه مــختنق بـالدمـوع
وما لوش دوا غير لمسـه من إيد حبيب
عـجبى !!
كام اشـتغلت يا نيـل فى نحت الصـخور
مليـون بئونـه وألـف مليـون هـاتـور
يا نيل أنا ابــن حـلال ومـن خـلفتك
وليـه صـعيبـه عـلى بـس الأمــور
عـجبى !!
كربـاج سـعاده وقلبـى منـه انجلـد
رمـح كأنــه حصـان ولف البلــد
ورجـع لى نص الليـل وسألنى . . ليه
خـجلان تقـول انـك سـعيد يا ولـد
عـجبى !!
لـيـه يا حبيبتى مـا بيننـا دايمـاً سـفر
ده البعـد ذنـب كـبـير لا يـغـتـفر
ليـه يـا حبيبتى مـا بيننـا دايمـاً بـحور
أعدى بـحـر ألاقـى غيـره اتـحـفـر
عـجبى !!
. . فى يـوم صـحيت شاعر براحة وصفا
الـهـم زال والـحـزن راح واخـتـفى
خـدنى العـجب وسـألـت روحى سـؤال
أنـا مت ؟ . . والا وصـلت للفلسـفه ؟
عـجبى !!
فتحـت شــباكى لشـمس الصـباح
مـا دخلش منـه غير عويل الريـاح
وفتحـت قلبـى عشـان أبوح بـالألم
ما خرجش منه غير محبـه وسـماح
عـجبى !!
غمض عينيك وارقص بخفـة ودلـع
الدنيـا هى الشابـة وانت الجــدع
تشـوف رشـاقة خطــوتك تعبـدك
لكـن انت لو بصيت لرجليك . . تقع
عـجبى !!
عجبـتـنى كـلمـة من كــلام الـورق
النـور شـرق من بين حـروفهـا وبـرق
حبيت أشيلها ف قلبى . . قالت حــرام
ده انـا كـل قلب دخلت فيـه اتحــرق
عـجبى !!
نظـرت فى الملـكوت كتيـر وانشـغلت
وبكل كلمـة (ليه ؟) و(عشانيه) سـألت
اسـأل سـؤال . . الرد يرجـع ســؤال
واخـرج وحيـرتى أشـد ممـا دخلـت
عـجبى !!
تسـلم يا غصن الخـوخ يا عود الحطب
ييجـى الـربيع . . تطـلع زهورك عجب
وانا ليـه بيمضـى ربيع وييجـى ربيـع
ولسـه برضــك قلبـى حتـة خشـب
عـجبى !!